養成良好嘅訓練習慣與目標達成:
健身係刻苦嘅，係需要忍耐嘅，要達到一定程度嘅目標所花費嘅時間並不能以日或月嘅單位去計算，再加上重量同使用健身器材嘅技術之高深，一唔小心或者唔以合適嘅方法去訓練，係會增加受傷風險嘅，種種因素令到好多人都會唔願意踏出第一步，唔願意去變強，一日到黑就怕呢樣怕果樣，最終強字就無你份，弱就伴隨你一生
唔好意思，但一啲都唔誇張，可能你會話:唔係咁易架X師傅
點解唔易，因為響你心目中覺得好難，無方向，無從入手，所以你需要嘅就係方向同去計劃
第一步:搵到訓練上嘅樂趣與滿足感
一開始你需要嘅唔係點樣去學習好複雜嘅技巧，而係先搵一啲容易嘅方法去進行左初步嘅訓練先，例如係健身室入面嘅器械，門檻較低，男女老幼新手都易於掌握上手，受傷風險低，咁就可以先小試牛刀都激活左久未活動嘅肌肉先，或者如果你本身係愛好技術型嘅人士都可以先從徒手訓練開始，去掌握一啲初步嘅肢體控制，當你完成初期嘅訓練後，你會得到肌肉嘅彭脹感或者係學習嘅成功感
第二步:搵到持續性嘅契機
當你嘗試過新手入門嘅感覺之後，其實你就可以開始一步一步搵出你自己最有興趣嘅訓練方法，而唔係週圍聽人講邊個方法係最好可以點邊個訓練門派又係最快有效果，你應該去自己搵出一個你中意而又想繼續發掘嘅方向，例如你係中意舉起重量提升力量果種感覺嘅就應該嘗試去尋找力量訓練進步方法，你係中意完成訓練之後嘅果一種膨脹感嘅就應該去覺習鍛練肌肥大，如果你係中意操到盡好爽嘅，你就可以發掘一下混合式訓練體能與力量嘅模式，總之就搵出你中意，你想進步嘅方向
第三步:技術
嚟到第三步先係技術有無搞錯，無搞錯，如果最初你連鍾唔鍾意都唔知，又搵唔到開心嘅感覺，你又點會有心去學更加多呢，所以當你以最安全同低門檻嘅方式得到左興趣同滿足感之後，你係時候就要精進自己嘅技術去進步同防止自己受傷，去實踐更高嘅目標啦，例如係開始去嘗試進行高難度與三大項槓鈴動作，更重嘅重量接觸，完成引體上升與雙槓撐體等等之基本挑戰，進一步強化身體能力
第四步:正確嘅健身理論與科學
學識正確嘅健身理論與科學知識，就好似係肌肉增長嘅原理，漸進超負荷，代謝壓力，機械張力，最大回復訓練量，訓練強度，學下點樣寫Program，等等等等.......
呢個一定係最後，反而係於想打造良好訓練習慣嘅大眾群中應該要放得最唔重視，因為咁多繁複嘅科學理論，如果要你一開始就去深究先再去訓練嘅話，當堂就望而生畏啦，仲想我去操野，放呢一點響最高位係因為當你真係愛上左訓練之後，真係有興趣去再深究令自己變得更好你其實就自然會想知得更多，就算你覺得再去學習去辛苦唔去行埋呢一步都已經無所謂啦，因為你而經可以持之以恆去做你中意做嘅事啦
上述嘅四步曲其實就唔係真係要你逐步逐步去做嘅，如果係真係好有心其實你係應該要一齊去進行嘅，但最容易咁樣做到嘅通常有咩人呢，就係有會課金去搵健身教練嘅人啦又或者係真係天生就好熱衷去研究嘅人，但作為一個忙碌嘅都市人，一個大壓力嘅學生，又或者係想放鬆心情訓練嘅人，有一個好嘅循序漸盡嘅觀念去踏出第一步先係最重要，訓練應該係開心嘅，有滿足感嘅，就係通向良好習慣嘅開始!!!
圖: KAPO, 文:Burger
#KOFGYM #Training #concept #muscle #strength #enjoyment #I #practical #strong #science #sustainable #happy #health #Fitness #Coach #Progress #easy #stepbystep #訓練 #Hongkong #肌肉 #力量 #科學 #系統化 #循序漸進 #不進則退 #持續性 #開心 #滿足感 #樂趣 #自強不息 #肌力訓練
Search